ໜັງສືພິມວຽງຈັນໃໝ່ ສະບັບວັນທີ 25 ຕຸລາຜ່ານມາ ໄດ້ລາຍງານໃນວົງຈອນກິລາວ່າ ໜ້າເສຍດາຍແທນທີມຊາດຍິງລາວ ທີ່ໄດ້ພຽງຊີງທີ 3 ແຕ່ຍິ່ງໜ້າເສຍດາຍໄປກ່ວານັ້ນກໍຄື ຫວຽດນາມສາມາດຍາດເອົາທີ 3 ໄປຄອງ ສ່ວນເຈົ້າພາບໄດ້ພຽງທີ 4 ນີ້ ຖືວ່າເປັນອີກບົດຮຽນໜຶ່ງໃຫ້ກັບທີມນັກກີລາເຕະບານຍິງທີມຊາດລາວ ໃນການແຂ່ງຂັນລະດັບອາຊຽນ ເພື່ອມາພັດທະນາວົງການກີລາເຕະບານຍິງ ກ້າວສູ່ເວທີພາກພື້ນ ແລະ ສາກົນ.
ການແຂ່ງຂັນເຕະບານຍິງຊີງແຊັມອາຊຽນ (AFF) ປີ 2011 ທີ່ລາວເຮົາເປັນເຈົ້າພາບ ຊຶ່ງຜົນການແຂ່ງຂັນໃນວັນທີ 25 ຕຸລາ 2011 ຜ່ານມາ ທີມຊາດລາວລົງສະໜາມພົບກັບຫວຽດນາມ ຊຶ່ງເກມການແຂ່ງຂັນທີ່ທັງສອງຝ່າຍ ຕ້ອງກັບມາລົງສະໜາມພົບກັນອີກ ຊຶ່ງຜົນການແຂ່ງຂັນອອກມາວ່າ ລາວບໍ່ສາມາດລົ້ມທີມຊາດຫວຽດນາມໄດ້ ເຖິງແມ່ນວ່າທີມຊາດລາວ ຈະໃຊ້ຄວາມພະຍາມຍາມສຸດຂີດເພື່ອເອົາຊະນະ ແຕ່ກໍບໍ່ສາມາດມ້າງເກມຂອງຫວຽດນາມໄດ້ ເຮັດໃຫ້ຈົບການແຂ່ງຂັນ 90 ນາທີ ຫວຽດນາມເອົາຊະນະໄປ 6-0.
ສຳລັບຄູ່ຊີງຊະນະເລີດ ທີ່ລົງສະໜາມໃນວັນດຽວກັນ ທີມຊາດໄທ (ຮອງແຊັມອາຊຽນປີ 2009) ພົບກັບມຽນມາ ນັ້ນ (ອະດີດແຊັມອາຊຽນໜຶ່ງສະໄໝ ໃນປີ 2007) ເລີ່ມການແຂ່ງຂັນ ຖືວ່າໄທມາແຮງກ່ວາ ສາມາດຍິງປະຕູນຳ 2-0 ໃນເຄິ່ງເວລາທຳອິດ ມາເລີ່ມເຄິ່ງເວລາທີສອງ ໄທຍັງໄດ້ປຽບ ແຕ່ມຽນມາເອງບໍ່ຍອມອ່ອນຂໍ້ ຈົນສາມາດຍິງປະຕູທັບໄຂ່ແຕກຈົນໄດ້ ໄລ່ຂຶ້ນມາເປັນ 1-2 ແຕ່ໜ້າເສຍດາຍ ທີ່ບໍ່ສາມາດຍິງປະຕູຕີສະເໝີໄດ້ ເຮັດໃຫ້ຈົບເວລາການແຂ່ງຂັນ 90 ນາທີ ໄທເອົາຊະນະ 2-1 ຄ້ວາແຊັມ AFF 2011 ມາຄອງໄດ້ສົມໃຈ.
ການແຂ່ງຂັນຄັ້ງນີ້ ຖືວ່າເປັນບົດຮຽນອັນສຳຄັນຂອງນັກກີລາລາວເຮົາ ທີ່ຕ້ອງຖອດຖອນເອົາປະສົບການ ເພື່ອມາພັດທະນາທັກສະໃນການຫຼິ້ນບານ ຄອງບານ ເພື່ອເຮັດໃຫ້ວົງການກີລາບານເຕະຍິງລາວ ໄດ້ຄ່ອຍໆພັດທະນາຂຶ້ນ ເຖິງວ່າເຮົາຈະຢູ່ໃນອັນດັບ 4 ແຕ່ຖ້າທຽບໃສ່ປະສົບການແລ້ວ ເຮົາເອງຍັງດ້ອຍກ່ວາປະເທດອື່ນຫຼາຍ ເນື່ອງຈາກວ່າຫຼາຍປະເທດທີ່ເຂົ້າຮ່ວມການແຂ່ງຂັນ ລ້ວນແລ້ວແຕ່ມີປະຫວັດອັນພົ້ນເດັ່ນໃນລາຍການດັ່ງກ່າວ ນັບແຕ່ປີ 2006 ເປັນຕົ້ນມາ ເຊັ່ນ: ເລີ່ມຈາກມຽນມາ ໄດ້ເຂົ້າຮ່ວມນັບຕັ້ງແຕ່ເລີ່ມມີການແຂ່ງຂັນ AFF ໃນປີ 2006 ເປັນຕົ້ນມາ ແລະ ເຄີຍໄດ້ເປັນແຊັມໜຶ່ງສະໄໝຄືໃນປີ 2007 ແລະ ເປັນອັນດັບ 4 ໃນປີ 2006-2008-2009 ຕໍ່ມາຄົງເປັນຫວຽດນາມ ທີ່ເຄີຍເປັນແຊັມ 1 ສະໄໝ ໃນປີ 2006 ອັນດັບສອງ ໃນປີ 2008 ແລະ ອັນດັບສາມໃນປີ 2007 2009 ມາເບິ່ງເບື້ອງທີມຊາດໄທ ກໍເຄີຍເປັນຮອງແຊັມສອງສະໄໝຄື ໃນປີ 2007-2009 ແລະ ເຄີຍເປັນອັນດັບສາມໃນປີ 2006-2008.
ສຳລັບທີມຊາດລາວເຮົາ ແມ່ນເປັນປີທຳອິດທີ່ໄດ້ເຂົ້າເຖິງຮອບຮອງຊະນະເລີດ ເຖິງວ່າຜົນງານອອກມາບໍ່ຄ່ອຍດີ ກໍຕ້ອງຮຽນຜິດຮຽນຖືກໄປ ແຕ່ສິ່ງທີ່ແນ່ໆກ່ວານັ້ນຄືຜົນງານທີ່ອອກມາ ແມ່ນສະແດງເຖິງການພັດທະນາວົງການກີລາເຕະບານຍິງລາວ ໄດ້ມີການຂະຫຍາຍຕົວ.
No comments:
Post a Comment